ΕΙΔΗΣΕΙΣ

Obama paralajmëron Rusinë

Tensionet janë rritur dramatikisht në territorin ukrainas të Krimesë, gjatë së premtes, teksa ambasadori i Ukrainës në Kombet e Bashkuara ka paralajmëruar Rusinë, të mos përshkallëzojë dhunën në kufijtë territorialë të vendit të tij, një paralajmërim që erdhi pak kohë përpara t’i bashkangjitej edhe ai i Shteteve të Bashkuara, që nxisin Rusinë të tërhiqet nga rajoni, ose të përballet me pasojat.

“Tashmë jemi thellësisht të shqetësuar nga raportimet mbi lëvizjet ushtarake të ndërmarra nga Federata Ruse brenda Ukrainës”, tha presidenti Barack Obama, gjatë një deklarate televizive nga Shtëpia e Bardhë. “Kjo sjellje do të përbëjë një shkelje të pastër të angazhimit të Rusisë për të respektuar pavarësinë, sovranitetin dhe kufijtë e Ukrainës, si dhe ligjet ndërkombëtare”.

Obama tha se çdo dhunim i sovranitetit të Ukrainës dhe integritetit territorial të saj do të ishte “thellësisht destabilizues” dhe paralajmëroi se “Shtetet e Bashkuara do të jenë përkrah komunitetit ndërkombëtar në afirmimin se do të ketë kosto tepër të mëdha në rast të ndonjë ndërhyrjeje ushtarake në Ukrainë”.

Komentet ishin të fundit, nga një seri e zhvillimeve tepër të shpeshta, që panë zyrtarët ukrainas të përballen me rritjen e pasioneve separatiste në rajonin me popullsi kryesisht ruse, ku hapësira ajrore është mbyllur dhe komunikimet mes Ukrainës dhe Krimesë janë ndërprerë.

Ukraina akuzon forcat ruse në Detin e Zi se janë përpjekur të pushtojnë dy aeroporte në Krime, por sipas tyre, ishin forcat e sigurisë së Ukrainës që ndalën marrjen e tyre nën kontroll nga rusët.

Ministri i Brendshëm i Ukrainës, Arsen Avakov, e karakterizoi më herët prezencën në aeroport të njerëzve të armatosur e të paidentifikuar, të cilët mbanin veshur uniforma pa shenja identifikuese, ai një “pushtim i armatosur”.

Kriza e Ukrainës ka përfshirë të gjithë botën tashmë, teksa presidenti i Këshilit të Sigurisë në OKB ka zhvilluar takime private mbi zhvillimet e fundit, ndërkohë që liderët botërorë kanë bërë thirrje që grupet e armatosura të mos përpiqen të sfidojnë sovranitetin e Ukrainës.

 

burimi www.top-channel.tv

ΔΗΜΟΦΙΛΗΣ ΑΡΘΡΑ

Νέα, ειδήσεις για την Αλβανία και τους Αλβανούς στην Ελλάδα. Μεταναστευτικά νέα, ιθαγένεια, πολιτογράφηση, κώδικας μετανάστευσης, επικαιρότητα, Ελλάδα

To Top